Manly Beach und Sydney

Das isch Sydney!
Das sind Tina und ich im Pub :-)

Links obe isch Manly Beach, rechs obe isch susch irgend en Strand

Hi Swisspeople! ;-)

bi geschter s'erscht mal in Manly Beach gsi! Das isch det woni wird id Schuel gah! Isch en mega schöne grosse Strand (hät sehr vill Surfer)! En Kolleg vo dä Lori (Frau vo mim Verwandte) hät mi det chli umegfühert und chli Manly zeigt, dä Strand, d'Schuel usw...isch echt voll dä Hammer det!

(S'Problem isch nur, dass ich zwei Stund Wäg het vo North Parramata us woni wohne, müesst zersch 30min laufe oder 15min dä Bus näh, dänn dä Zug und umstiege und nomal en andere Zug näh und zum Schlus no d'Fähre) Drum hani etz d'Familie gwächslet, bi geschter gad gschwind a dä Schuel go fräge gsi und etz händs mer scho abem Sunntig e neui Familie zueteilt! Ha mega Freund! S'isch anschinend es Ehepaar wo zwei erwachsni Chind i mim Alter händ (die wohned aber nüm dihei, sind aber hüfig det! :-)). Sie händ es Huus mit ere schöne Ussicht, ha 2 min. zum Strand und mit em Bus 10 min. id Schuel und is Zentrum! :-) isch ja eh voll dä Hammer! Wird dänn im Verlauf vom Sunntig umzieh und drum scho abem erschte Schueltag vo det chöne gah! Isch natürlich scho vill besser...Schrieb eu dänn wieder meh, sobald ich dänn det bin!

Am Abig hani dänn no s'Opera House und d'Harbour Bridge aglueget und gfötelet. Die beide Sache sind genau det, wo d'Fähre ebe achunt vo Manly! Isch würklich mega idrücklich und schön! Ha dänn au all die Hochhüser vo Sydney gseh und natürlich alles gfötelet! Dänn bini det no in Botanische Garte chli go chröse, ha ebe müesse uf d'Kollegin warte! Dä isch au mega schön grüen und uh gross! Gad nebet em Opera House! :-)

Am halbi 7ni hani denn d'Kollegin troffe (sie isch scho sit 2 Jahr in Australie und per Zuefall au gad in Sydney! Sie hät ebe dä australisch Pass, drum cha sie so lang da bliebe!). Händ beidi riiesig Freund gha, dass mir eus wieder gseh gha händ nach so langer Ziit! :-) Sind dänn is eltischte Viertel vo Sydney eis go zieh! Händ eus natürlich mega vill z'verzelle gha! Aber isch es geils Pub gsi, hät e Terasse gha und vo det obe hät mer über ganz Sydney gseh!

Also, das wär mal s'neuschte vo mir! Meld mi wieder wänni News han!

Hebeds guet i de Schwiiz und hoffe, ghört mal vom einte oder andere öpis! Vermiss eu scho mega, bi halt scho chli ällei da une...aber nüm lang, sobald ich i de Schuel gsi bin, wirdi ja anderi Lüütlis kennelerne und däne gahts dänn glich wie mir! :-)

Liebs Grüessli Juli