das isch d'charte vo da, ganz obe isch manly woni wird id schuel gah, i de mitti bondi beach und une maroubra (das isch vo det woni geschter gloffe bin)
die zwei fotene sind bondi beach
das isch cooge beach
irgend sone riese eidechse dänki
ich (händ gschwind ghalte bim laufe) das isch d'sicht womer hät bim laufe! :-)
das isch au irgend e küste, weiss nüme welli
da simer go schwüme, weiss dä name nüm, hät so vill stränd! :-) *schäm*
Hi together!
so schnell isch es gange, und ich han scho mis erschte weekend da in sydney verbracht...also ja, dä sunntig isch nonig gsi, aber muess ja eh wieder alles ipacke und dänn zügle, vo däm her wird ich denn nid so vill mache!;-) (hey lüüt, es isch mer z'ufwändig zum gross und chlischriebig beachte, drum schriebi vo etz ah eifach alles chli...*grins* schliessli macht mer das ja im englisch eigentlich scho so!)
also, ha mich am fritig abig wieder mit dä tina troffe, das mal aber in town hall, isch en anderi station in sydney, so wie z'züri d'hardbrugg oder oerlikon usw...(hm, kenn ja momentan susch no niemert da in sydney). dänn simer mit em bus uf cooge ad beach! det häts so es pub (palace)! sind dänn det ie, eis go zieh und esse, will es isch eh scho langsam dunkel worde, drum häsch am strand nüm so vill chöne mache und usserdem isch es mega chalt gsi (anschinend isch bis etz dä summer nonig würklich warm gsi da)! händ dänn mega vill quatscht, so über alti ziite, lüüt wo mer beidi kenned, usw...isch no easy gsi, realy quiet! nach es paar stund simer dänn heiglofe zu ihrem fründ sinere wg in marubra (isch am strand chli wiiter südlich). bi ebe det go penne, will ich bi mir susch ohni schlüssel ja nid iecho wär! isch no easy gsi, ha zwar nid guet pennt, will d'kollegin gschnarchlet hät! das hassi echt mega!
naja...sind dänn trotzdem recht früeh ufgstande und dänn hät eus dä eint mitbewohner (aussie) gad mit em auto an strand vo cooge bracht, dänn hämer nid alles wieder müesse laufe! :-) dä hät sich ersch gad en tag vorher es auto kauft gha! det simer dänn ines resti, natürlich dusse, und händ en feine zmorge gässe...so richtig frische orangjuce und toast with bacon and eggs! mmh....zwar chli tüür, aber ebe....nachher simer vom cooge beach alles gloffe bis bondi beach! isch no recht wiit, aber isch mega schön gsi, alles am strand entlag. zwüschet ine simer neume churz go bade, damit mer eus chli händ chöne abchüele! da muesch echt ufpasse, gaht nid lang und du wirsch rot, also immer schön sunnecreme istriche! händ no paar tier uf äm weg gseh! :-) däfür hani nachher voll blatere gha a de fuesssole! uh strub, aber bi mich halt nid gwöhnt mit flipflops dä ganz tag z'latschte! muess mer denn chli bequemeri chaufe! naja...s'isch dänn no so einigermasse gange mit laufe, bi eifach chli ghunke gäg dä schlüss und wohni ufem heiweg gsi bin, isch eini eifach voll platzt und s'ganze brandwasser isch useglofe! *wäh* womer in bondi beach gsi sind, simer no chli am strand ghängt, händ mir en australischi handynummere kauft und ufglade und öpis trunke! chli erholig muess au si...wänn ich immer so vill laufe, dänn bini ja nachher mega schlank! :-)) das isch sich ja min körper nid gwöhnt! nacheme ziitli simer dänn mit em bus zrugg id city (town hall) und sind det zum swisshotel (d'kollegin und ihre fründ sind ebe nachher no det id sauna!)! ha dänn det no churz ihre fründ kenneglernt (isch dütsche, wo dahi usgwanderet isch) und nachher bini dänn ällei hei uf north parramatta! ich säg eu, s'isch asträngend gsi, aber würklich schön! überigens, d'australier sind mega sportlich, hät brutal vill lüüt gha, wo am strand entlang jogget sind! und det gahts zum teil e stäge ufe, dänn abe und es isch zum teil a de pralle sunne! müesstet eus glaub es biespiel a däne näh! und dänn au no relativ früeh am morge! hmmm....
ja, etz isch sunntig und ich muess etz dänn afange packe, damit ich rechtziitig uf d'fähre chume! wird no abegfahre an bahnhof parramatta, so muess ich nid no e halb stund z'fuess mit em gepäck umelatsche! dänke ja, dass es dänn no recht schwierig wird wärde! muess ja umstiege zweimal! :-/ aber das chunt scho guet! freu mi irgendwie mega! richtigi australier !
also, wünsch eu au es schöns weekend und bis gli...hebed mir düme, damit d'schuel guet losgaht für mich!
tschüssli
eui juli
Keine Kommentare:
Kommentar veröffentlichen