7. weekend - sydney- easter show

das isch a de easter show! das sind alles chuechedekoratione wo irgendöper gstaltet hät, isch doch mega herzig das entli, nid wahr?! :-)

das isch au en chueche, dasmal aber en drache...

a eim ort isch dä ganz bode voll gsi mit däne tafle, hät goldigi, silberigi und brozeni gha, wahrschindlich nach rang wo d'persone gholt händ! ha sogar en schwiizer gfunde, wo da öpis gholt hät, aber kei ahnig wär das isch?! no nie ghört leider! aber hät uh schön usgseh! ha so freud gha, woni switzerland gseh han, dassi das gad ha müesse fötele...:-)

das isch eini gsi, wo sich amale lah hät! also s'tütü und dä bh sind chleider, aber das blaue isch alles gmalet und es isch uh schön, häsch chum gseh, dass es gmolet gsi isch! aber hey, die dame isch da scho 6 stund ghocket...hm...villicht langsam chli lang?! ;-) ok, s'resultat hät sich ja wenigschtens gseh lah! sie hät gad welle luege wie sie usgseht woni si gfötelet han und dänn hani ihre halt mis foti zeigt und sie hät uh freud gha! :-)

das isch am abig uf em heiweg gsi in dee way beach, ca. 2 dörfer wiiter vo harbord won ich wohne! hät sehr schön usgseh...muess glaub mal a de beach go relax...

das isch am samschtig am cooge beach gsi! au ganz schön, aber ha nüt zum bade däbii gha und bi drum nid is wasser...aber isch au eifach cool gsi, zum chli det chile und nüt mache...:-)

das isch au am cooge beach gsi, plötzlich isch d'sunne hinter dä wulche verschwunde und äs hät hammermässig usgseh, wills so en wiise rand rundume gäh hät bi dä wulche! hani drum gad müesse verewige...:-) jaja, ich bin halt chli en japaner! *grins*

hihi...das isch wieder im olympic park, sorry, isch mängisch chli schwierig mit dä reihefolg, chunt ebe nie so druf, wies du ifüegsch! aber easy...das isch bim igang gsi und dä chopf wo mer da gseht isch d'margot! ;-)

das isch än springbrunne bim igang, ich säg eu, das gländ isch riesig! aber glaub recht usserhalb vo sydney, jedefalls simer lang unterwegs gsi! guet, chasch ja au nid eifach zmitts ine sone riise alag boue...

and party...nei, such a fun isch es nid gsi, aber chönder ja läse im textli, susch hanis für nüt gschriebe! ;-)


hey swiss

I'm here again...:-)

han eu ja versproche, dassi am weekend nomal öpis schriebe und au chli länger, aber ehrlichgseit, chani das mit em chli meh und länger schriebe nid würklich ihalte, will ich han das weekend gad nid so vill erlebet! :-/ aber ich hoffe, ich chan glich chli öpis zämefasse und vorallem es paar bilder druf tue...:-)

also, zersch zum samschtig! am morge hani welle uspenne, willi mal chli schlaf brucht het (bi vorher es paar täg am abig relativ lang dusse gsi! :-/), aber das isch irgendwie nid gange! mini hostfamily vermietet ebe s'appartment (isch i irem huus ine, aber mer chan e tüür zuemache und dur dä hinderigang ine) wills das nid bruchet und drum hät ca. all 2 min s'telefon gschället! :-/ händ mega vill interessente gha...brutal! naja...has probiert, aber ha nur chli chöne döse, aber besser als gar nüt! dänn hät zwar d'kollegin aglüüte und gfräget, öb mir scho chli früener chöned abmache für an märt und dänn isch es mit "penne" eh scho bald verbii gsi...bin dänn mal ufgstande und han en rechte stress gha! aber das hani am morge immer, ha nie gross ziit, au dihei nid! *grins* ha mi dänn uf dä weg zu dä ferry gmacht und woni det gsi bin hani gseh, dass ich mich au no verlueget han im fahrplan und ersch 15min später in sydney bin, als ich de kollegin gseit gha han! *oops..* naja...isch glaub nochher nid so tragisch gsi! :-) sind dänn mit em auto (ihre fründ hät ebe es auto da) an glebe market gfahre! hät recht vercher gha, was halt ame samschtig i de stadt normal isch! sind dänn chli a däm markt gsi, aber isch nid so en grosse gsi und hät au nid so schöni sache gha! aber neuem häts die roote süesse lange gummiteiler gha (die wo mi guet känned, wüssed das ich die liebe...*smile*) und dänn hani natürlich scho gad müesse eini chaufe (isch ebe es riise teil gsi da)! die hanid dänn schön gnosse...mmmhhh...isch uh fein gsi! :-) susch hani mer nüt kauft dete...nachher simer na anes bbq an cooge beach, will irgend en ehemalige brasilianische flatemate vo dä tina ihrem fründ für 5 mönät zrugg uf brasilie gaht! ha eigentlich nid unbedingt welle det hi, ha ja niemert kennt susch, aber d'tina hät gern welle und isch froh gsi, dass ich mitcho bin, will sie susch eigentlich au niemert kennt! drum bini gange...:-) isch na easy gsi, ha nüt brätlet, aber eifach susch es paar sache gässe! dä tag isch perfekt gsi für das, schön und warm, will i de letschte täg isch es nämlich amix nid gad sehr warm oder schön gsi! "it's getting winter now" hät mini hostmother gseit! :-( schad, aber immer no besser als dä winter bi eus, jedefalls vo dä wärmi här! bi eus isch däfür dä schnee schön! :-) mir händs dänn glich no super gha, d'tina und ich händ mega gueti gspräch gha und das hät mer wieder mal zeiget, wieso as mir eus so guet verstönd! sind eifach sehr änlich ime gwüsse grad und händ änlichs duregmacht bzw. erlebt! isch schön, wänn mer öpert hät, wo soo wiit weg isch, aber äs hät sich irgendwie nüüt gänderet i meh als 2 jahr! :-)))) bi dänn so am 6i gange, will ich han glich en recht lange wäg hei vo däm beach! bi schlussendlich nämli ersch am 8ti dihei gsi, will dä bus im vercher nid vorwärts cho isch und ich drum d'fähre genau um ca. 2 min. verpasst han! :-( aber isch nid so tragisch gsi, bi dänn ines paar souvenirläde, wills dusse so chalt gsi isch und han no es paar schöni sache gseh! :-) am abig bini dänn hei und ha chli dä abig dihei gnosse und nid vill gmacht, bi echt z'müed gsi zum na use! ebe, wie gseit, nüt speziells und boring!

hüt (sunntig) bini mit es paarne ad easter show im olympic park! das isch det wo di olympische spiel gsi sind im 2000! det isch jedes jahr so e show, hät verschiedeni ständ, chilbi, shows usw...halt chli wie es albanifescht oder susch e grossi chilbi, aber eifach vill wiitläufiger und grösser! aber mir sind alli chli enttüscht gsi vom ganze! heted meh erwartet, chli spezielleri shows und so wiiter! ich meine isch nid gad günschtig dä itritt! aber ebe...mängisch isch nid alles so super und mer weiss es halt nid immer im vorus! aber mir händ fun gha und es isch en schöne tag gsi (sunneschii und heiss)! aber wäni etz nid gsi wär, heti au nid vill verpasst würi säge! ussert d'gmeinschaft mit dä andere! am abig hani dänn leider na därfe mini ufzgi mache! :-( aber isch no schnell gange eigentlich! bim esse hani na mit dä host chli gredt und mir händs uh luschtig gha! ha ihne chli schoggi abote, woni gschickt becho han und sie händ mega freud gha und si uh gern gha! :-) hani uh herzig gfunde...ah ja, falls ihr das gsehnd: sie danket mim mami und papi herzlich für di fein schoggi! :-) ich natürlich au....*mmh....* so, das wärs etz scho wieder vo mir, eher churz gsi und au nid so spannend dänki, aber has glich müesse ieschriebe!

wünsch eu e super gueti und schöni summerafangswuche und mer ghört sich gli wieder und ich hoffe, dassi dänn chli bessers z'verzelle han! :-)

see you

about this week

g'day mate

nume churz, tue wieder es paar föteli ine, aber dasmal eifach vo verschiedene sache! han die wuche nid so vill unternoh, bi eifach es paar mal am abig weg und drum häts au paar fotene gäh! usserdem häts chli neui lüüt gäh, woni äntlich mal gfötelet han, schöni naturmoment usw...und schliesslich weti die ja mit eu teile! :-) drum etz mini fotene (schrieb dänn nach em weekend hoffentlich chli meh, will gah dänn halt no weg, aber das gsehnd ihr ja dänn)! :-) also, zersch zu däre schuelwuche mit es paar fotene, uf dä rescht müender no warte...

ha am zischtig es oschterpäckli vo mine eltere becho und meeeeeeeeeeega freud gha, so herzig! :-))) mmh....und brutal fein! schwiizerschoggi isch halt scho s'bescht! *grins* und au na die liebe briefli vo jedem händ mi uh gfreut!

das isch überigens d'ussicht vo eusem schuelzimmer womer etz sit 2 wuche drinn sind! scho voll geil, gsehsch gad an strand, müend nur gad die strass wo mer gseht überquere und scho simer det! :-) wobi ebe, etz hämer ja so doofi schuelziite, da chasch gar nüm gross an strand! :-( aber ebe, isch immer no besser als i de chalte schwiiz! chan en wenigschtens aluege, entlanglaufe usw...

hüt abig im steynes im usgang, d'kathy us em appezell und ich! gang mit ihre id schuel und mir händs amix uh luschtig! :-) erinneret mi mängisch chli ad bms mit de tanja! *grins*

au hüt abig im steynes mit dä ganze gruppe, vo links nach rechts: kathy, d'cam (us frankrich), dänn mini wenigkeit :-), d'lidia us em tessin, d'jeanette vo züri und d'margot vo dintikon! händs luschtig gha und freud am fötele! *grins* aber isch ja au wichtig, dass mer mal d'lüüt fötelet, will susch hani ja gar kei bildlichi erinnerige a all die coole people...

nachher woni heicho bin vom usgang isch mer fasch s'herz stahbliebe, woni a mis fenschter glueget han! *hilfeeeeeeeee* aber ha dänn gmerkt, dass die hässliche spider dusse isch zwüschet schiebe und flügenetz, aber glich, wähhh....!

6. Weekend - Melbourne (Oschtere)

das isch d'ussicht vom eureka tower obenabe! mer gseht da dä botanisch garte und das wiise gebäude i de mitti isch s parliament house! (ah, chönd imfall uf jedes foti amix drufklicke, dänn chönders gross aluege und nachher eifach obe uf zurück und dänn chömeder wieder dahi, mängisch isch es susch glaub fasch chli chli! :-) nur für die, wos nid gwüsst händ!

das isch au vom eureka tower obenabe, vorne, das wo usgseht wie en chline eifelturm isch d'arts gallery, s'runde gebäude hine isch s'gricket stadtion und das wiise gebäude dänäbet (s'vordere) isch s'tennis areal wo amix s'australien open stattfindet! :-) hy roger....!!! *grins*

das isch de eureka tower, uf däm simer au gsi und händ di einte fotene gmacht! dä isch erscht 1 jahr alt...also ganz new!

das isch de ander tower womer cha beschtiege (mit em lift, susch vill spass dänn), da simer au dobe gsi und händ no fotene gmacht! händ ebe irgendwie de tower verwechslet und drum simer am schluss uf beidi, aber eigentlich hämer zersch immer uf dä ander welle, händ au gmeint seged det, aber dä da isch de vom reisefüehrer gsi! *schäm, peinlich*dä ander isch wahrschindlich gar nonig drinn, isch sicher z'neu! (nur churz, händ susch immer alles gfunde, zum teil ohni charte läse, nur zu eusere verteidigung, ich mein mir sind frau! ;-))

das isch d'london bridge, die isch eifach mal zämebroche und drum isch dä einti teil etz wie än riise stei ällei im ocean usse! früehner hät mer na chöne drüber laufe! (mini hostparents händ das no gmacht und ca. 3 täg später isch si zämekracht! *uiuiui, aber kei toti* isch au a dä great ocean road, i dä nächi vo dä 12 apostels!

das isch das alte gfängnis in melbourne, da sind jenschtige ghängt worde! das isch original us em 19 jahrhundert, teils sache händs müesse reschtauriere! isch uh dunkel und nid so ghür, muess mer ja au gstunke ha i däm gebäude! die chline zelle wos do no gha händ, hüt händs d'insasse ja fäng guet! hät sehr vill originali dokument, rüschtige, usw...gha! strub gsi, leider chli schwierig zum verstah, sehr alts englisch und spezifischi usdrück! :-(

kenned ihr die verbrecheri? *hm...grins* d'nummer (hät nu zwei verschiedni gha) hani ganz konkret usgwählt! s'1 isch für nüt speziells, oder sägemer für mini einzigartigkeit! *bigsmile, ibildig*, nei seich! 23 isch mis alter das jahr, ha zwar nonig gebi gha, aber chunt no! und 4.7. isch gad no mis geburtsdatum! mega zuefall, hani scho gad die müesse näh! das isch au im gfängnis und das isch imfall bis 1994 in gebruch gsi für so 1. gfangenahm wäge z.b. trunkeheit! isch krass, isch uralt, aber so lang brucht worde! :-)

das isch ime sehr bekannte ichaufszentrum, block acarde us äm letschte jahrhundert! ganz alti irichtig, hät au nu uh spezielli läde drin (isch ja aber zue gsi, hät nur chöne inä, wils än durchgang isch) und dä bode isch es mosaik! gfallt mer ja nid speziell, aber eigentlich scho no krass wie die früehner amix d'sache "schön" gmacht händ! da häsch ja monate zum dä bode mache! vill spass he...;-)

melbourne vom rialto tower obenabe! uf dä towr ganz links simer dänn au no ue und händ us em 88. stock (ca. 300m höch dete) fotene abegmacht! isch scho cool wämer so höch isch, mer hät e super ussicht! :-)

das isch im rainforest a de great ocean road! isch sehr chüel und dunkel det ine, aber schön grüen! ganz anderi wälder als mir händ...

das isch s'schönschte gsi zum aluege: di 12 apostels, mer gseht nid ganz alli, will zwei sind no unedra uf dä anderi siit, chönt höschtens vom flugi us alli druf bringe! aber echt riesig und unglaublich, raged eifach so zum meer usse! :-) ha uh freud, dassi die gseh han! leider isch d'sunne chli doof gstande für d'föteli! :-( drum gsehts so halbe unscharf us...

di zwei apostel uf dä andere siite, da isch s'liecht besser gsi! :-) hät aber lüüt gha wie blöd, isch ja nid normal gsi, vorallem asiate! die sind scho überall!

das isch lochard gorge und i dä nächi vo dä apostels! da isch irgendwie es ganzes boot kennteret und nur 2 händ überläbt, d'tochter vo däm vos schiff ghört hät und en arbeiter vom schiff! eifach interessanti buildings gits vo de natur....

damit ihr au glaubed, dass ich die föteli würklich selber gmacht han! :-) bin also würklich det gsi, wien ihr gsehnd häts gwindet und es isch nid so warm gsi! :-)

das isch s'twist lighthouse uf äm weg zu dä great ocean road, isch en schöne lüchturm, leider hät mer nid uechöne und mer hät e schöni ussicht ufs offne meer!

a de great ocean road hämer neume eifach koala's i dä eukalyptusbäum obe gseh! isch no krass, het nid dänkt, dass mer die eifach so normal vo dä strass us gseht! :-) sind scho herzig, es stinkt eifach irgendwie!

das isch dä usblick vo dä great ocean road ufs meer! hät di meischt ziit so usgseh, wunderschön, eifach alles a de klippe entlang, kilometerlang!

uf dä andere siit vo dä strass häts hüfig so usgseh, busch, steil ue, grüen und susch nüt! völlig andersch als links, det isch s'meer...

da simer im regewald gsi und das isch en riise baum wo gspalte isch, da hämer chöne driistah und mer sind nid obe acho! leider hät mini kamera gad chli es problemli gha, aber mer gseht ja hoffentlich was söt si! :-)

das isch d'st. patrick's cathedrale in melbourne! e riise chille mit mega schöne brünne im garte wo amix immer no ganz gross en bibelvers staht! alt, aber uh genial! :-)

das isch s'cottage vom captain cook (entdecke vo australie)! das hüüsli (elterehuus vo ihm) händs i 2000 teili zerleit und vo england uf australie bracht und wieder zämebout! isch uh herzig, chli aber süess! wie im märli, hine häts na en garte mit verschiedene chrüter und gmües, das isch ihm zu ehre apflanzt worde, will er uf gsundi ernährig glueget hät, au bi sinere schiffsmannschaft, drum isch keine gstorbe! :-) hm...hät fein nach pfeffermünz gmschöckt gha...

das isch dä shrine of remembrance, das heisst das isch en tempel vo a alli gfallne soldate vom 1. weltkrieg söt erinnere! nebet zue häts nomal es dänkmal gha wo a alli erinneret wo im 2. weltchrieg umcho sind! es hät au es füürli brennt!

vo däm shrine hät mer ä super ussicht uf melbourne gha! hät gad grad us uf d'skyline gseh, isch würklich schön gsi!

das isch im royal botanic garden im melbourne! eifach wunderschön grüen, natur, bäum, wasser usw...mer fühlt sich da richtig wohl bim umelaufe oder höckle! cha chille, relaxe, d'rueh gnüsse...



hey mate :)

what's going on? *hihi*


nei, kei angscht, schriebe in dütsch wiiter, usserdem isch es zum teil slang und dänn wärs chli unfair gägenüber däne, wo das nid chönd!

also, bi über d'oschtere mit ere schwiizerin wo id klass nebet zue gange isch (heisst au adriana, wie mini schwee, kenn susch keini! :)) uf melbourne gange! ha dänkt, wänn mer scho nur eis weekend händ, wo so lang isch, dänn söt mer scho öpis speziells mache und nid eifach da in manly bliebe wie immer und villicht mal en tagesusflug mache! da chasch einiges meh unternäh hani mer gseit! gseit, buechet und scho simer det gsi...:-)

am dunschtigabig am 21.45 hämer eigentlich dä flug gha, aber da es gwiiter ghärrscht hät, hämer 45 min verspätig gha, aber easy...isch nid so tragisch gsi, hauptsach mir sind gfloge, susch hets mi dänn akackt! zum glück hät mer bi eusem backpackers 24 stund am tag chöne ichecke, susch wärs no blöd cho, sind nämli ersch mega spat acho, händ ja 90min flug gha und dänn mit em taxi (isch 60 dollar gsi, vill z'tüür, hämer im rückwäg nüm so gmacht! :-( ) no müesse zum hotel! guet...isch alles guet gange susch und au dä backpacker isch easy gsi...suber und günschtig, aber hät scho chli strubi lüüt ume gha und au s'personal isch zum teil voll schräg gsi, aber es hät glanget, sind ja eh nur zum schlafe det gsi und susch unterwegs gsi! (händ aber zum glück en 4er-schlag reserviert gha! :-))


am fritig morge simer bi ziit ufgstande (8ti) und dänn simer los! mit em tram (hät det überall tram wie in züri) simer id city! dänn simer dä ganz tag unterwegs gsi und sind vo sehenswürdigkeit zu chile, vo chile zu gärte, vo gärte zu musee, usw...gwatschlet! sind glaub i dene 3 täg kilometerwiit gloffe! :-) aber tuet guet, da weisch wenigschtens wieso am abig müed bisch! *grins* händ würklich sehr vill interessanti und schöni sache gseh! leider isch es chli chalt gsi für da (ca.17 Grad) und mir händ amix fasch chi gfrore, händ halt kei winterchleider mitgnoh gha und es isch amix en rächte wind gange, aber besser als räge! am abig simer dänn hei und händ eusi rucksäck abglade und sind dänn um dä egge bim backpackers id pizzeria go richtig feini italienischi pizza esse! ;-) hm...italienisch?! ja, muess au mal si, vermisse chli dä "schwiizerfood" und da häsch di würklich gad wohl gfühlt! nachher simer todkaputt, aber gueter luune und vollem mage is näscht, will mer am samschtig au wieder en lange tag vor eus gha händ!


am morge am 8.00 hät eus nämli s'büsli abgholt (zum glück gad vis-à-vis vom bp) und mir sind ab uf d'great ocean road tour! das isch ganz cool gsi...euse fahrer isch en clown gsi, aber luschtig, hät chli usgseh wie en samichlaus, langi wissi haar und en mega bart! *gröl* sind dä ganz tag mit em büsli und ca. 20 andere guys unterwegs gsi und sind au wieder vo sehenswürdigkeit zu sehenswürdigkeit! isch mängisch chli stressig gsi und chli ad ziit bunde, aber isch normal, händ halt müesse das und das i däre ziit durebringe, händ ja schliesslich au für das zahlt! aber hät sich 10mal glohnt...so wunderschön! nu scho d'gor (great ocean road) isch uh schön, alles dä küschte entlag, schlänglet sich die strass und mer gseht so vills chöni stränd, s'meer, natur, bäum, koalas i dä eukalyptus obe usw...aber s'highlight sind natürlich scho di 12 apostels wo mer gseh händ! die sind riisig und wuchtig, eifach traumhaft und wunderschön! het nid dänkt, dass die so riisig sind! aber händ au susch no einiges gseh, aber cha nid alles ufzelle, susch wirds elle lang! müend halt dänn d'fotene aluege! :-) sind dänn dä ganz tag unterwegs gsi und z'abig hämer no neume ime dorf aghalte und händ öpis z'nacht gholt und dänn simer heigfahre und öpe am 9ni wieder z'melbourne gsi! sind dänn recht uf dä schnure gsi und nur no go dusche und ab id federe...


sunntigmorge und am 8ti ufstah?! *hmmm...* naja...so isch es halt wämer öpis wot gseh und erlebe und dä tag usnütze! (usserdem hät mer eh nüm chöne penne, will di eint im zimmer so luut gschnarchlet hät *i-hate-it*) guet, sind dänn wieder us em näscht ghüpft und wie am fritig ab id stadt! dänn hämer di andere sehenswürdigkeite no in agriff gnoh, womer am friitig nid gseh händ! (sind nüm so vill gsi, meh läde, ichaufsstrasse usw...) aber leider händ die läde alli zue gha (händ da susch am sunntig offe)! aber isch au guet gsi, so hämer chöne chli dureschlendere und luege, fötele usw... und händ däfür kei geld usgäh! nur am market wo offe hät am sunntig, hämer eus paar sächeli kauft, aber die sind nid so tüür gsi! isch no en riise märt gsi! nachher simer no is gfängnis vo melbourne, det wo dä erscht verbrecher ghängt worde isch! es isch immer no s'originale gebäude, zum teil chli restauriert, aber isch so no grausig gnueg gsi! aber interessant und lohnenswert! am namittag simer dänn no uf dä tower ue und händ d'ussicht vo 250m obenabe gnosse! mit däm bilett hämer au am abig nomal chöne ue (häsch es eifach vorher müesse abstemple lah) und drum simer eusi ruckseck wieder go heitue und will di ander pizzeria zue gha hät bi eus em backpacker, simer halt wieder stadt zrugg und vor em esse namal go d'skyline vo melbourne bi nacht go beguetachte! isch scho immer wunderschön, nu leider wärded d'fotene nid so guet! :-( nachher simer no s'letscht mal fein go ässe und händs eus guet gah lah und dänn isch es hei, mir händ alles müesse ipacke und dänn is bett für e churzi nacht...


...will am morge am 5.40 hämer scho wieder därfe ustah und händ eus müesse parat mache, d'better abzieh, uschecke, dä airportbus näh und an flughafe! euse flüger isch dasmal pünktlich am morge am 8.15 gstartet und es isch uf sydney zrugg! tortz dem mir so früeh gange sind, bini ersch am 12 dihei gsi (flug, zug, fähre, bus und dänn no chli heilaufe)! :-( nachher hani na dä halb namittag därfe uzgi mache, will mer im firstkurs so vill händ, leider au übers weekend und ich eigentlich in melbourne nüt gmacht han! *schmerz* aber drum isch gad no guet gsi, simer scho am mäntigmorge zrugg (eigentlich hämer das wäg de billigere flüg gmacht)

s'fazit vo däm trip isch aber super: s'hät sich würklich glohnt, isch empfehlenswert, interessant und coo gsi! usserdem muessi das ez scho nüme bsueche wäni nachher gang go reise, das heisst, cha mir meh ziit für d'oschtküschte näh! :-) trotz allem: sydney gfallt mer besser! melbourne isch halt meh e industriestadt, sehr europäisch (han amix echt s'gfühl gha seg in züri, immer häsch tram ghört! :-)), aber hät au sini schöne plätz, gärte und sehenswerte objekt!

also, hoffe, händ chli öpis chöne mitnäh wasi a oschter so gmacht han! leider hani kei oschterhase gfunde in melbourne, aber ha glich schöni und vorallem spezielli oschtere gha! eigentlich schöner als immer di normale oschtere mit hase, schoggi usw...aber has glich chli vermisst! kei feini schwiizerschoggi, keis sueche, nüt...:-( eifach kei oschtere i "däm" sinn! für mich isch es halt glich irgendwie öpis wo däzue ghört, obwohls immer s'glich isch! hoffe aber, ihr händ schöni oschtere gha und nid z'vill eier und süesses gässe, nid dass ihr chugelrund sind etz! ich ha ja schliesslich alles abtrainiert, bi immer gloffe, und ihr?


so, en schöne oschtermäntig no und see you

5. Weekend - Taronga Zoo - Palm Beach

vo däm beach us hämer d'fähre zrugggnoh und sind wieder uf palm beach übere! isch en relativ chline strand gsi...

das isch palm beach selber, links uf em hügel gsehnder de lüchtturm, händ aber echt nüme möge alles uelatsche! s'meer isch e richtig schöni abchüelig für mini erhitzte füess gsi...:-)

das isch au palm beach, ha müesse s'schöne wasser fötele...:-)

das isch im nationalpark (bush) in palm beach, isch no mega grüen, aber eifach nur bäum, bäum, bäum und nomal bäum!!!! krass, wievil natur die aussies händ!

das isch d'ussicht gsi vonere steiplattform im bush obe! eifach traumhaft gsi! a de beach simer nocher abegloffe und wieder uf di ander siite übere!

das isch die ussichtsplattform gsi, vore isch es eifach es paar meter s'loch ab! *vorsicht* händ da chli müesse usruebe, d natur gnüsse und öpis esse

so häts amix dur dä bush usgseh, mer hät s'blaue meer gseh dureschimmere! traumhaft...

das isch irgend sones interessants steigebilde gsi! häts da no öpe die! hät aber lässig usgseh...

das isch dä strand bi dä akunft vo eusem schiff! chli, aber sehr ruhigs wasser und nebet dra isch ebe dä zeltplatz!

das isch es wallaby womer im bush gseh händ! isch schön stahbliebe zum fötele...:-) gseht änlich us wie es kangoroo, isch aber keis!

dä sam und catia uf eme riise stei, da hät mer au ganz e schöni ussicht gha! usserdem isch es schöns lüftli gange, dänn isch es nid ganz e so heiss gsi...

bush

eifach en weg im nüüt, nur natur rundume! mega ruhig, heiss und menscheleer...aber wunderschön! sind da alles entlang gloffe...



hey boys and girls

Am Sunntig simer z'vierte uf palm beach! (dä patrick, dä sam, d catia und ich)! händ eus am morge am 10.15 in warringah mall (grosse ichaufszentrum, ca. 15 min vo manly weg) troffe, will det dä bus l90 uf palm beach fahrt! mini hostfamily hät mi gfahre, wills gad händ müesse go poschte (da händ alli läde am sunntig offe)! isch no mega flott gsi, so hani mer scho de bus chöne spare det use! :-) mir händ eus dänn ebe det troffe und sind mit em bus bis uf palm beach ghötterlet! isch sicher ca. 40min fahrt! aber lohnt sich...

in palm beach simer dänn ufs schiff und as andere ufer überegfahre! (basin hät dä strand det gheisse) det häts en camping platz und es isch dä afang oder schluss vome weg dur dä bush (nationalpark)! mir händ dä dänn in agriff gnoh und sind i däre hitz bergufgschuenet, ha gmeint ich stärb! :-) gschwitzt hani wie e sau, und mini sehne (achillessehne) isch glaub au nüm di bescht, hät mer immer weh ta bim uelaufe! naja...wo mer dänn dä stutz gha händ unds gradus gange isch, isch besser gsi, dänn hämer au nüm so gschwitz! aber schön isch es gsi, hät sich trotz em liide glohnt! :-) händ 2 freiläbendi wallaby gseh, eidächsli und spinne en masse! da häts spinnenetz vo baum zu baum, das glaubed ihr gar nid! huuuuge...!!!! :-) mir sind es paar stund i dem bush unterwegs gsi und gloffe, fotene gmacht, d'ussicht gnosse und, und, und...irgenwenn simer am nächschte strand une gsi und händ det wieder s schiff gnoh und sind wieder uf palm beach übere gfahre! det hämer dänn zersch mal heisshunger gha und eus bime take away en burger iedruckt! hämer au verdient gha, sind schliesslich sportlich gsi! :-) usserdem isch scho irgendwie halbi 4 oder no später gsi!

nach em mage voll schla, hämer eus wieder uf dä weg gmacht, das mal aber nur churz, und sind an palm beach! händ müesse usruebe, chli sünnele und chli bade! isch richtig erfrischend gsi das meer! händ chli i dä welle tummlet und eus nachher i de abigsunne tröchne lah! a däm strand isch de sand ganz anderscht gsi als bi eus in manly: rötlich, grobchörniger und es hät brutal vill chlini müscheli überall drinn gha! vo da us hät mer e gueti sicht gha uf dä luchtturm, wo mer eigentlich au no händ welle go aluege und uestiege, aber mir händ eifach nüme möge, wär nomal mega wiit gsi und das händ eusi füess nüme möge! usserdem isch es scho abig worde....drum hämer eus dänn so am 6i uf dä heiwäg gmacht (d'catia isch scho chli früehner gange, will sie susch irgendwie kei gueti bussverbindig me gha het)! händ wieder dä buss zrugg gnoh (sind fasch verfrore, wills d'klima so brutal chalt igstellt händ) und in warringah mall hämer eus dänn trennt! dä sam isch heigloffe und dä patrick und ich händ dä 139er gnoh und sind mit däm hei! er hät dänn chli früehner chöne usstiege als ich, däfür no chli müesse laufe und ich ha gad bis hei chöne fahre, isch nämli dä bus woni au susch immer muess näh für id schuel! (apropos schuel, bi di letscht wuche und au die bis etz immer id schuel gloffe und au wieder hei, so spari geld und mach ersch no öpis gsunds, dä weg isch ja schön, alles fasch am strand entlang!)

dihei hani eigentlich no es paar sache welle mache, aber ich bin so uf dä schnure gsi, dass ich eifach ipennt bin! s'liecht hät no brennt, dä pc isch no agstellt gsi usw...aber ich han echt nüm möge! ha au am morge lang pennt, susch verwachi immer so ca. am 6i und chan amix bis am 7ni (woni bis etz ha müesse ufstah) nüme schlafe! das heisst, bi würklich mega dure bi rot gsi und has brucht! aber hät guet ta! :-)

so, das wärs wieder mal vo mir, nächscht wuchenend hani dänn vill z'verzelle, will ich ja uf melbourne gange! wünsch eu ganz schöni oschtere und gnüssed die freie täg! bis zum nächschte mal...tschüssli




das isch am samschtigabig im usgang gsi! vo links dä patrick vo chur (isch mit mir i de klass gsi), d'simone vo meile zh (isch im klassezimmer nebet eus gsi) und dä sam vo buchs sg (isch e klass unter eus gsi und macht etz mit mir s'first)

dä patrick und d'simone, voll in action am tanze! :-) hät spass gmacht!

natürlich händ mir zwei fraue au no müsse es foti ha! :-) bin schön brun, gäl?! naja...jedefalls brüner als suscht und für mini verhältnis nid schlecht! :-)

das isch im zoo, d'ussicht uf sydney übere! gsehsch eifach alles, wunderschön! händs richtig gnosse!

mit däne bähnli hämer müesse vo dune vo dä kasse in zoo ue fahre! luschtig, gäl?! mir bruchet die chli andersch, aber ebe, anderi sitte, anderi kultur! :-)

das isch d'ussicht vom schiff gsi, womer in zoo gfahre sind, sorry, d'reihefolg stimmt nid so ganz, aber isch irgendwie nid so gange wieni han welle! :(

ice age?! ich glaub, ich weiss wos das tier härgholt händ für dä film! :-)) *smile* gseht doch echt genau so us? und luegt au no so!!!

hät zwei riise bäre gha! aber fuul sinds gsi! es wunder, dass dä sich no ufgsetzt hät, aber wahrschindlich hät er halt is internt welle...;-)

bambie...nei, isch irgend en art vo reh, aber lebt irgendwo in afrika oder wo!

das sind otter! die sind brutal schnell, has nu gad verwütscht, willi scho abdruckt han, bevors cho sind! :-)

schlange hämer e tonne gseh! das isch eini vo dä grössere da, aber weiss nüme welli genau! hät so vill und vo dä 15 giftige schlange wos git, lebed 11 in australie, super, gäl?! *Hilfe*

das sind affe! heted ihr nid gwüsst, oder?! ;-) leider hani dä riisig gorilla nid chöne fötele, dä isch nämlich drinne gsi hinder dä schiibe und äs hät immer so gschpieglet, isch eifach ungmöglich gsi! :-(

das isch irgend sones komisches fiech, wo mer glaub in brasilie oder wo findt! kei ahnig wies heisst, gseht eifach chli us wie e chue mit zebrastreife und hörner! *grins* wäns öpert weiss, därf er mir susch gern schriebe! :-)

das sind etz di richtige zebra, bitzli andersch gsehnds scho us!

an elephant...

da hani leider nid so guet chöne fötele, will dä mega wiit weg gsi isch und au no d'gitter däzwüschet sind, aber isch glich herzig worde, nid?! isch glaub en leopard...? bi mer aber bi dene raubtier nie sicher, welles amix welles isch!

dä seehund hät gad schön posiert, dass mir ihn händ chöne fötele! :-) cool typ, dä weiss wies gaht...:-)

das sind so komischi igel gsi, aber ha kei ahnig, wies würklich heisset, sorry! ha mir eifach nid all näme chöne merke! :-/

aber das weissi, en giraff! *freu* sind scho riise tier, aber trotzdem wunderschön findi!

eine isch ganz näch zu eus cho und ich han chöne es portrait vo ihm mache! :-) dä weiss au, wie mer berüehmt werde chan!

vom zoo us hät mer immer wieder e super ussicht gha uf sydney, aber vom giraffechefig us isch sie glaub am bescht gsi! häsch alles gseh, sydney tower (dä dünn turm mit de runde kupple obe), d'harbour bridge und eifach di ganz skyline! guet, s'opera house fehlt da, aber das hämer au no gseh vo da obe! :-) dä zoo isch ebe genau uf dä andere siite vom meer!


hy together...

das weekend hani wieder voll vill erlebt und bi chum zum usschnufe und usruebe cho...drum bini etz am sunntigabig so richtig froh, dass ich chan im bett liege, chli am pc schriebe, maile, lese usw...mängisch brucht mer mal wieder en ruhige abig! :-)

also, etz fanged mer mal vorne ah: mir händ eus am samschigmorge am 9.15 bi de warth in manly troffe (patrick, catia und ich). dänn isch scho mal s'erschte chli schief gange, will mir händ irgendwie no gipfeli und kaffi poschtet und gar nid gmerkt, dass scho 9.25 isch und dänn isch eus leider d'fähre genau abgfahre! :-( super, das hät gheisse, 45min. warte (fahrt am weekend und am morge halt amix nid so vill)! toll...ha nur irgendwie 3 stund gschlafe gha, heti mir das chöne verlängere, wänni gwüsst het, dass mir nachher trotzdem e fähre später gönd! naja...take it easy...händ dänn halt no chli s'wetter gnosse, sind no chli dusseghocket und händ z'mörgelet...:-) s'andere problem isch no gsi, eigentlich wär dä sam au no mitcho, aber dä hät irgendwie verpennt und isch gar nid cho...(d.h. er hät dänn mal aglüüte und gseit, er chämi na)! guet, das isch mal klärt gsi...dänn isch es dänn würklich mal 10.15 worde und mir sind uf dä fähre gsi und ab isch es gange uf sydney! dänn isch euse cooli afang wiitergange: wo mir in hafe fahred, fahrt genau d'fähre ab wo in zoo gaht und mir händ wieder därfe e halb stund warte! naja...am schluss isch es e stund gsi, will ich han gmeint, mis ticket (ha so es mehrfahrteticket für d'fähre) seg überall gültig und has nid usprobiert bim warte, uf dä mexikaner wo eus ersch am hafe z'sydney troffe hät, und wo mer händ welle ine, isch es nid gange...wär ja nid so schlimm gsi, aber s'problem isch gsi, am schalter häts e mega schlange gha und es isch eifach kein meter fürschigange...woni dänn s'ticket äntlich gha han, isch d'fähre genau abgfahre...;-) unglaublich so öpis, nächscht mal probieris vorher oder fräge, da chasch ja nie sicher si! jedefalls hämers dänn irgendwänn doch mal no gschafft und sind im zoo acho! d'fährefart hät sich au glohnt, will mer e super ussicht gha hät vo det! :-)

guet, dänn hämer müesse mit em 6-er-gondeli zum igang im zoo! *grins* hani au no nie gseh, dass mer so in zoo gaht, aber why not!? ;-) mir sind nachher mal i ei richtig losgloffe, will da musch di eifach entscheide, will de zoo isch riesig! nach churzer ziit hät dänn au scho dä sam aglüüte und gseit, er segi da! (isch au nid schwierig eus izhole, wämer so hüfig d fähre verpassed! *schäm*) sind dänn dä ganz namittag im zoo umeghüeneret und händ all die ville tier aglueget...isch echt no spannend gsi, will die händ zum teil tier gha, wo mir nid mal gwüsst händ, dass es die git! aber mängisch isch es fasch chli z'heiss gsi, aber mer söt sich ja nid beklage über d'sunne, händ susch scho gnueg räge gha! völlig kaputt sind mer jedefalls am abig wieder uf d'fähre und zrugg uf manly (dasmal aber ohni verpasse! :-)) uf äm heiweg hämers no mega luschtig gha, will mer eifach ab allem händ müesse lache vor müedigkeit! ah ja, öpis ganz wichtigs heti no fasch vergässe: mir händ dä ganz tag englisch gredt, will dä mexikaner und di wälschi ja kei dütsch chönd! (guet, dä mexikaner hät chli düütsch chöne und nid mal schlecht! ;-)) aber glich, bi richtig stolz druf, dass mir so schön gredt gha händ!

trotzdem, dass mir so müed gsi sind, sind mir am samschtigabig no mit es paarne im usgang gsi! sind zersch i de shark bar gsi (bar, disco, billard, pingpong usw...)! det isch leider d musig chli scheisse gsi und drum hämer det nur eis trunke und sind dänn übere is steynes, wie susch au immer! det sind eifach immer all studente! :-) (das isch au es disco, sehr oft mi lifeband, bar, pub..., aber mehrstöckig und wiitläufig)! händ dänn det no chli tanzed, chli öpis trunke und sind dänn "leider" au wieder ersch am 3 dihei gsi, obwohl mir am sunntig au scho wieder früeh abgmacht gha händ! :-(( aber ebe, mini hostfamily hät gmeint, seg ja no jung! :-)