Pfingste, Muettertag und Mäntig frei, nur ich han nüt vo alle dem! :)

das isch uf eusere exkursion mit dä schuel! isch d'sicht vo dä sternwarte us uf sydney! :) mega schön, nid? sterne gseht mer halt kei...;)

es paar vo mine mitschüeler und links vorne eusi lehrerin bim esse! :) luschtigs tischli gsi, sind glaub die teilers wo mer i de ikea chan chaufe zum übers bett zieh! :) händ da nämlich d'ikea au...

am namittag nach eusem schuelusflug im botanische garte mit äm sam, dä katrin und dä andrea us norwege! hät nu chli blendet...

dä sunneuntergang am shelly beach bim bbq! eifach jedes mal wieder vo neuem traumhaft schön findi!

und no am lion dance (buddha festival) d'leue, hät echt no witzig usgseh! sind immer zwei lüüt under eim gwand gsi, dä eint hät eifach müesse di hindere bei und dä ärsch und so darstelle! ;) isch sicher recht unbequem für dä...


hey swissguys

und, wieder fit und munter und usgruebet i di frisch wuche gstartet nach euem lange wuchenend? :) hoffes doch schwer...ich "därf" nämlich morn (mäntig) id schuel, usserdem hämer no s'2. mock exam, also gar nüt vo relaxe und easy näh...:( naja...s'isch halt etz eso! chum zwar nid drus, wieso die da kei pfingste händ, aber sind halt aussie und die sind eh strange...:)

so, fanged mir doch a verzelle, was mer die wuche alles erläbt händ! langsam chani nüm so vill schriebe und vorallem hani nüm so interessanti fotene, will eus nämli fäng d'sache zum unternäh usgönd...aber ich probiers etz glich mal...

bi eigentlich die wuche bis am mittwuch jede abig dihei bliebe, will ich gfunde han, ich muess amix au chli ziit für mich ha, will di nächscht wuche wärded mir immer unterwegs si! langwilig, ich weiss...am dunnschtig isch es dänn däfür chli spannender gsi für eus! mir sind nämlich mit dä schuel id rocks (ältischte stadtviertel vo sydney) und händ so wie e gfüehrti tour gmacht, wo mir schüeler aber dä to guide gsi sind. das heisst, mir händ eus am morge zersch i dä schuel troffe, sind i gruppene iteilt worde (glücklicherwiis sind mir drüü zäme gsi! :)), händ pro gruppe 2 sehenswürdigkeite zueteilt becho und händ dänn müesse i 45min über beidi infos usem internet usfindig mache! nachher i dä rocks hämer dänn jewils vor em gebäude oder was au immer das es gsi isch, müesse eusi "red" halte...isch irgendwie na cool gsi, jedefalls vill besser als schuel, hät mal chli abwächslig drii bracht! :) am 2i simer dänn mit dä ganze manschaft ines cafe go esse und nachher sind mer für dä rescht vom tag freigstellt gsi und ufzgi hämer au no kei gha! :) das chönt immer so si...*träum* isch en wunderschöne tag gsi und ich bi dänn no mit es paarne in botanische garte, händ det öpis zum dessert gässe und eifach chli pläuderelt und s'schöne wetter gnosse! am abig hani dänn mit dä tina abgmacht und mir sind zäme ines pancakerestaurant (creperie) go z'nacht esse! mmhhh...ich säg eu, das isch echt mega fein gsi! so vill verschiedeni crepes! ha zwei schoggicrepes mit schoggiglace und frische erdbeeri gha...köschtlich gsi echt! ja und dänn isch scho euses wuchenend wieder vor dä tüür gstande...:)

am friitgabig hämer mit dä parallelklass und allne lüüt wo susch vo eusem schuelhuus no cho sind, wieder es bbq am shelly beach gmacht! isch voll chillig gsi, chli ässe, plaudere und relaxe...schad isch halt nume, dass relativ früeh dunkel isch und drum au recht schnell chüel wird, vorallem wänd nur umesitzisch! aber sind dänn glich bis am 10ni det bliebe und nachher zrugggloffe und hei! am samschtig händ mir 3 (d'margot, d'katrin und ich) dänn mal en lockere tag vor eus gha! :) sind nämlich eifach uf dä mittag an beach go d'sunne gnüsse! :) händ würklich glück gha und en relativ warme tag verwütscht! :) d'margot und ich sind sogar no es paar minute is meer go bade, obwohl s'wasser ziemlich chalt gsi isch! *brr* zum z'mittag hämer das wo mer vom friitigabig vorig gha händ no uf dä grill ghaue und so gad wieder öpis richtig feins zum esse gha...:) nachher hämer no chli planet, sache besproche und so wiiter, wo mer no wänd mache, unternäh oder go aluege i eusne letschte 4 wuche! :) gaht langsam schnell, heieiei...zum z'vieri simer dänn is schoggicafe (da häts eifach nur sache mit schoggi zum esse) und händs eus guet gah lah...tija...dänn isch scho wieder abig gsi und mir sind hei! ich han mir voll dä gmüetlich abig dihei gmacht, will mini host nid dihei gsi isch! s'isch independence day im tv cho und dänn hani mir so en richtig schöne fernseh abig gmacht! hät echt guet tah...lueg da so guet wie nie fernseh, will ich erschtens nid däzue chume, 2. die eh nur ca. 5 sender händ und 3. meischtens eh nid das luege, wo mini host lueged und dänn nid eifach wet oder chan umstelle! s'krasse isch eifach, da hocksch ellelang vorem tv, wills da mit dä werbig no vill schlimmer isch als bi eus! chunt ca. all 10-15min, zwar chürzer als bi eus, aber chasch würklich chum chli luege, scho isch d'werbig wieder da! drum gaht au en film öppe dopplet so lang als er eigentlich wär! :/ *rrr* aber ebe, ha ja geschter ziit gha...:) und hüt morge simer so früeh use, will in sydney s'buddha festival isch und mir dänkt händ, villicht segs no öpis interessants, jedefalls dä lion dance, aber händ eus chli tosche! isch recht langwilig gsi und mega churz und dä rescht hät eus eh nid würklich interessiert! dänn simer halt nachher eifach mit em zügli wo i dä "luft" fahrt go e rundi drülle und nachher hämer welle is pancakeresti (di andere händ nach minere schwärmerei au gad luscht druf über cho! :)) aber det sinds bis weiss wo agstande (muess begehrt si!), dass mer halt sind go past ässe! nachher hämer voll nüm gwüsst, was mer susch no sölled mache, will mer irgendwie vill z'vill ziit gha händ und usserdem mega schlapp gsi sind! hät eus nüt richtig agmacht, händ nid möge gross umelaufe usw...dänn hani mi entschiede zum heigah am 3, ha ebe au no so mega gfrore und bi echt mega müed gsi! di andere sind dänn no go souvenir oder so poschte, aber ich han das ebe alles scho und ha nid so luscht gha! usserdem würi dänn nur wieder öpis gseh wo mer wür gfalle...:) uf dä fähre hät mi dänn no so en alte grossvateraustralier aquatscht und gfrägt vo wo ich seg usw...da hani mit di ganz fahrt gredt! :) isch mega herzig gsi, am schluss hät er mich no welle nächscht wuche zume kaffi ilade, aber das hani dänn nid so welle und au gseit, seg voll beschäftigt (was wahr isch)! hät mer dänn mal sini telefonnummere gäh, aber lüüt eh nie ah und er gaht am friitig uf amerika für es halbs jahr, d.h. d'wahrschindlichkeit dass ich ihm über dä weg laufe, isch relativ chli und usserdem chani ja dänn immer no säge, seg ebe zu beschäftigt! :) aber isch no cool gsi, so mit öpertem mal chli z'pläuderle...

ja, das wärs scho wieder gsi vo mir! chli langwilig gsi die wuche, aber di nächscht wird däfür brutal "busy" mit prüefige, usflüg und verabschiedig vo minere host, will die ja uf frankriich id ferie gönd! das heisst, söt eu nächscht mal wieder chli öpis interessanters chöne brichte! :) aber mer chan ja au nid nur immer voll di coole und spannende sache unternäh, gaht ja nid! :)

wünsch eu e gueti wuche, isch ja ganz e churzi für eu! :) und gnüssed s'schöne summerwätter, ha ghört, heged recht warm! :)

langsam gahts scho bald am endi vo minere schuelziit zue, ha nämlich nur no 4 wuche schuel! :)) dänn weissi dänn au nüme, öb ich min blog no so aktuell chan halte, will bim reise wirdi sicher nid immer so vill ziit ha und vorallem wahrschindlich kei internet! :( drum gnüssed no di letschte ca. 4 iträg wo sicher na folged! :)

also mini lüüt, passed uf eu uf und ich hoffe, ihr händ alli eui müettere nid vergässe! ;)

see you, juli