halbziit! :-/

das isch im eiger swiss restaurant! gseht mer, dass es es schwiizer resti isch? ;) mega herzig gmacht, echt typisch schwiizerisch! isch recht volle gsi nachher mit lüüt und er und d'frau mached alles ällei...nid schlecht du!

ha mi so greuft über mis feine esse, dass ich gad es föteli han müesse mache!

das isch eine vo däne trupps a de anzac parade gsi...

di einte alte lüüt sind i so militärfahrzüüg duregfahre worde! händ amix gwunke und mega freud gha! :) di einte sind mit em rollator cho, di einte sogar im rollstuehl, echt meega alti mängisch!

schotte im schotterock und dänn händs immer de trurig duddlesack gspillt, aber passt ja eigentlich gad zu däm...

hihi...! sind überracht gsi über di coole polizeiauto wos da händ! :) voll stylisch, nid? eusi sind da gad langwilig, aber was au da isch, es sind "opel"! guet, d'aussies händ da ihri eignig marke, villicht ebe genau drum?! ;)

das isch en hammer sunneuntergang gsi, wo mer im luna park gsi sind! ha glaub no nie so en schöne und farbige himmel gseh! :) rägebööge hani däfür scho öpe 3 gseh...

d'margot und ich bim tennis spielle...:)

d'katrin und ich bim tennis spielle! ok, mir händ amix z dritte gspillt und es riise chäferfescht gha! :) händ immer müesse lache und das ganze überhaupt nid im griff gha im gägesatz zu dä andere spieler wos no gha hät...hihi...

das sind d'nicole, ich, d'debby, d'katrin und d'margot am shelly beach bim barbecue vo dä cam (französin)! sie hät geburi gha!

das isch mini hostfamily! gsehnds nid symphatisch us? mini hostmother (maeve) isch ursprünglich vo irland, min hostfather (mick) isch aussie...

am friitig im usgang hani mir mal en tüüre cocktail gleischtet, will ich endlich alles abgschlosse han mit däm rückflug, reise usw...:) hät richtig guet ta...


hey mini liebe

scho isch wieder e wuche verbii und ich han einiges zum schriebe! gaht scho immer rassig und ebe wie ihr gsehnd, bini etz scho über dä halbziit! :-/ irgendwie freui mi, aber irgendwie au nid! isch halt scho e cooli ziit, häsch es relativs easy läbe, cooli lüüt wot jede tag zäme bisch und gsehsch und es wunderschöns land! uf di ander siite freui mi au, dass ich wieder mal hei chan, mini gwohnt umgebig ha, wieder all das feine esse (vermisse gwüssi sache wie brot, röschti usw...) und vorallem mini lüüt wieder um mich z'ha! naja...aber etz gahts ja no es wiili, und drum schrieb ich etz über die wuche und s'weekend! :)

also, am mäntig simer zersch go tennis spille und nachher hani wieder mal mit dä tina in sydney abgmacht und mir sind ines pub eis go zieh und händ wie susch immer eifach chli pläuderlet und öbis trunke! am zischtig bini dänn mit dä katrin (schuelkollegin) nach de schuel na churz eis go zieh, will i dem grusige wetter wo mer bis am fritig gha händ, häsch gar nid vill anders chöne mache! :( leider...am mittwuch hät no di eint fränzösin geburi gha und mir händ es bbq am beach gmacht, aber hät amix chli gregnet, aber im grosse und ganze hämer glück gha! :) und dänn isch scho wuchenend gsi für eus! :))

mir händ nämlich am friitig frei gha will ebe anzac-day (australian, new zealand army corps) gsi isch! en fiiritg zum gedenke, a alli gfallne soldate i allne chriege wo d'aussies mitgmacht händ! das heisst, mir sind scho am dunnschtig abig in usgang und händ e chli gfiiret...sind ines pub wo dä einte ihre hostfather gitarre gspillt hät! (isch da ebe üeblich, dass es livebands hät i de pubs). d'margot und ich sind zwar scho um ca. mitternacht wieder gange, will mir am friitig uh früeh händ müesse use bzw. händ welle use! mir sind nämlich uf d'8ti fähre und id city go d'anzac-parade luege vo am 9ni agfange hät! isch echt no witzig gsi, hät uh vill musige gha (chi wie gugge) aber natürlich händs chli anderi sache gspillt! sehr vill schotte i schotteröck und so gha, wills halt da mega vill vo däne hät! händ dänn ca. ei stund zueglueget und nachher sind mer wiiter, händ es paar backpackers abklaperet wo i dä nächi gsi sind, will d'margot no eis brucht, wänn ihri family chunt! dänn simer churz an markt, will ich no es speziells t-shirt brucht han und nachher simer uf die halbi 1 in hyde park ad anzac-red! isch no idrücklich gsi, händ chör gha wo gsunge händ, eine wo d'red ghalte hät (mer häts au no ziemlich guet verstande) und verschiedeni soldate! isch echt speziell gsi, muess mer scho mal gseh ha, wänn mer scho da isch! schliessli muess mer sich chli integriere und vo dä kultur und dä sache vo dä aussies lerne, wänn mer scho so lang da lebt! :) nachher hämer no es chlises usfährtli mit dä fähre uf parramatta gmacht und wieder zrugg (müend ebe euses bilett usnütze :)) und dänn simer no churz mit dä andere fähre in luna park (chilbi) und go luege, wo euses schwümmbad isch, wo mer am sunntig dänn ane sind. ja und nachher isch dä tag au langsam z'end gange, aber s'beschte isch no cho: mir sind is eiger swiss restaurant go z'nacht esse! :))) isch echt dä hammer gsi, ha natürlich röschti mit spiegeleier und salat gnoh und es isch eifach köschtlich gsi! Mhh...fein! d'inhaber sind schwiizer und d'frau isch ds winti wülflinge id schuel (mängisch gits scho zuefäll he) und er isch eigentlich ursprünglich vo frankriich, hät aber i villne schwiizer resti kochet gha! händ immer düütsch mit eus gredt... isch echt luschtig gsi...zum dessert hämer dänn no es schoggi fondu gässe! das isch natürlich au ganz guet gsi...und dänn isch es hei mit dä fähre und is bett! isch en relativ wiite wäg vo däm reschti bis hei, aber hät sich glohnt! :)

am samschtig hämer dänn zersch mal usgschlafe, dass muess nämlich au mal si! :) dänn sind mer id warringah mall go shoppe, was mer eigentlich gar nid so richtig vorgha händ! :) aber da häts eifach so vill cooli und schöni sache, da muesch mängisch eifach zuegriffe! :) hihi...nachher hät sich d'margot no d'negel gmacht und ich han währenddesse schön brav mini ufzgi gmacht, händ nämlich uh vill gha über das weekend! :( nachher simer beidi hei go z'nacht esse und dänn uf di 22.15 fähre ab in erschte richtig grosse usgang id city! :)) d'margot und ich ällei, will d'katrin ja z'melbourne isch! sind is three monkies gange, will ä kollegin vo dä margot gmeint hät, es seg no guet! Und siehe da, es isch echt dä hammer gsi! :) s'coole isch ebe da, dass eigentlich immer kei itritt muesch zahle und das obwohls meischtens e liveband hät! :)) echt super, müessted sich d'schwiier mal e schiebe abschniede...hihi...jedefalls simer di ganz nacht am shake gsi und händs mega gnosse! sind dänn uf dä 4 bus und hei uf manly...ha dänn eifach no ca. e halb stund müesse heilaufe, aber isch voll easy...isch gar nid soooo lang, wie di einte amix gseit händ wot mit em bus underwegs bisch! das heisst, mir müend das sicher no es paar mal wiederhole...ah ja und nachtzueschlag zahlsch da au nid! :) (ok, das isch öpe s'einzig vo dä öv da besser isch! :() bi dänn öpe am 5.15 dihei gsi und dänn is bett go chröse...

jedefalls hani welle penne, aber das gaht da irgendwie nid, kei ahnig! cha da sit es paar wuche am morge eifach nie länger als bis am 7ni penne, meischtens verwachi no früehner, obwohli bis am 9ni chönt schlafe und susch ja eigentlich kei problem han und immer und überall chan schlafe! :( weiss au nid, was los isch...ha nid gad sehr vill gschlafe und bi dänn am 11i au scho wieder ufgstande und ha "z'morge" gässe und dänn bini wieder los! sind hüt zäme en easy tag go mache, d.h. händ ebe d'fähre gnoh und sind uf milson's point (ca. 5 min mit dä fähre vom opera house) und sind det id badi! zersch simer ca. 45 min im sprudelbad gsi, dänn id sauna und am schluss no im ussebad es paar längene go schwümme! :) nachher hämer eus in liegestuehl gsetzt und d'sunne endlich wieder mal chöne gnüsse (die hät sich nämlich sit drüü wuche hüt wieder s'zweit mal blicke lah!) wie sich's ghört händ mer no dä zweit teil ufzgi gmacht, also nid nur nüt gmacht! :) wo dänn d'sunne langsam abe isch, simer dänn wieder hei und etz hani no einigi sache woni muess erledige! :( aber ha au villes scho gmacht, eis isch nämlich dä blog! brucht au immer sini ziit! :) s'weekend isch wieder verbii und ich starte i di letschte 6 wuche schuel, d.h. di zweit helfti vom cambridge kurs! Gaht schnell sägi eu...

also, hoffe, händ spass gha bim läse und bildli aluege und bis zum nächschte mal! :)


love, juli