Neui Mitbewohner!

d'margot und ich am tennis spielle, so richtig voll im schuss! :)

hihi...mini schoggi und fuessballsache woni vo mine eltere becho han! :) mmhh...fein!

im schwiizer restaurant mit eusne lüüt! :) echt voll dä hammer gsi...

das isch geschter bim walk irgend sone cools steigebilde gsi wo mer nid gseh heted, wänn mer nid will mer s'gfühl gha heged, mer chöngi über die stei um d'klippe umelaufe, de weg gnoh gha heted!

nur damit ihrs glaubed, die zwei chliine sache wo mer i de mitti gseht sind delfin wo mer vom schuelzimmer us gseh gha händ! scho voll dä hammer! :)))


hallo leute

scho isch wieder e wuche ume! :) gahts scho wahnsinnig schnell! etz bini nur no 2 wuche da und denn isch d'schuel scho fertig! krass irgendwie, bi etz scho so lang da und etz chani d'wuchetäg scho bald a einere hand abzehle woni no da bin! irgendwie komisch das gfühl am fritig hani scho s'speaking, also drucked mir bitte alli ganz fescht d'düme! :) danke vill mal!

usserdem isch am mäntig dä sohn vo minere host mit dä fründin izoge und etz hani halt scho wieder nüm so mini rueh! :( irgendwie het ich's echt gnosse, di ganz ziit ällei z'si, aber isch scho easy! chöme ja guet anenand verbii! :) er isch eifach chli en chaot und laht amix alles umeligge und umestah! gseht mängisch us wie im soustall, aber ebe, so langs nid i mim zimmer isch und ers amix au wieder ufruumt (bzw. sini fründin), gahts no! :) hüt han ich zwar gsuget, wills so grusig usgseh hät im ganze huus! naja...

etz aber zu däre wuche: am mäntig bini mal am abig go jogge, muess öpis mache! :) isch no voll friedlich gsi, so im halbdunkel am strand entlang, s'meer z'ghöre usw...am zischtig namittag hämer vom schuelhuus us imfall ca. 10 delfine gseh! :))) uh mega hammermässig freud hani gha! :) sind no ziemlich näch gsi, eifach wunderschön! am abig sind d'margot, d'nicole, d'debi und ich go tischtennis spiele mit es paar anderne vo dä schuel! händ rundlauf und susch no so es paar game gmacht, isch echt witzig gsi! sind sogar gad no chli is schwitze cho, aber d'margot und ich händ glich immer verlore! :) am mittwuch hani wieder kaffichränzli mit dä tina i de city gha! am dunnshtig woni nach de schuel heicho bin, hani e mega überraschig vor em zimmer gha! :) es päckli us dä schwiiz vo mine eltere mit schoggi und alles so schwiizer em-artikel! :))) ha mega freud gha, eifach will ich überhaupt nüt meh vo ihne erwartet han! das isch echt e glungni überraschig gsi! :)

tija...scho isch es wieder weekend gsi! am fritig abig simer mit es paarne vo dä klas und susch no schwiizer namal is swiss restaurant go esse! isch voll cool gsi würklich! händ wieder mal schwiizerdüütsch gredt (nach dem das die beide koreanerinne gange gsi sind) und händ gjasset, garschlöchlet, und susch no es paar spieli gmacht! eifach voll friedlich gs! :) etz hani da une doch no richtig glernt jasse mit schiebe und wiise und so wiiter! :) eigentlich müesst ich ja öpis ander lerne, aber isch ja glich...:) am samschtig sind dänn d'katrin, d'margot und ich nomal uf en walk vo syndney (harbour bridge) bis zu dä spitbridge! hey, sind imfall ca. 20km gloffe! leider isch dä lauf nid agschriebe gsi und mir händ es paar mal dä falsch weg müesse näh und wieder umchere, aber susch hämers au voll luschtig gha! s'bescht isch gsi, dass ich mir natürlich no mini hose verisse han wo me über so klippestei gloffe sind! ;) neinei, zeigs föteli etz nid! :) (di andere händs natürlich so luschtig gfunde, dass es händ müesse bildlich festhalte!) am abig simer dänn na mit es paar andere schwiizer wieder mal an shelly beach go BBQ mache! das isch au no easy gsi, händ eus jedefalls eusi burger so richtig verdient gha nach so vill laufe! :) hüt händ d'katrin und ich eigentlich no chli welle an beach go sport mache, aber churz nach dem mer z'manly une gsi sind, isch es voll cho regne cho und chalt isch es au gsi, dass mer das dänn halt sii lah händ und nur eusi ufzgi zäme binere tasse tee gmacht händ! :( naja, so hämers wenigschtens chli luschtig gha bi dä ufzgi! mir sind dänn nach ca. 2 stund wieder hei und wies so isch, häts natürlich chum simer dihei gsi, wieder uftah und isch warm worde! aber au egal, so hani es paar sache susch chöne mache, wie z.b. wäsche, blog schriebe usw...

ja, das wärs scho wieder gsi vo mir! nid so speziell gsi das mal! aber glaub nächscht wuchenend hani wieder meh z'verzell! :)

e schöni wuche und bis gli...

eui juli