Letzti Schueltag Power English

das isch de mark, euse funny teacher! :-) hät eus da gad lemington (so wie bi eus die schoggiviereggli mit kokosnussstreusel obe druf) mitbracht und mir händ i de pause all im chreisli gässe! :-))) wänn mer vo irgendöpis gredt händ, dänn hät er immer gseit, er seg en mega guete choch, mega guete renner, mega guete schwümmer, dä schönscht, dä bescht usw...isch so luschtig gsi!

bi die week eigentlich jede tag id schuel und wieder heigloffe und ha drum es paar bilder vo mim schuelwäg gmacht! lauf ca. 15min dem strand nah, nachdem ich zersch de hügel ab, dänn duruf und wieder dä nächscht hügel durabgloffe bin und relativ wiit vorne isch dänn d'schuel! ihr gsehnd, han eigentlich en schöne weg! usserdem machi no chli öpis sportlichs da...:-) und spare chani au na gad dä bus

das huus wo am höchschte obe staht, isch minere host ihres! chönd eu ja vorstelle, dass ich e gueti ussicht han! :-)

das isch de blick uf manly abe, gsehni au uf mim schuelweg...

das isch eusi klass gsi, aber e wuche vorher, am letschte tag mit em andere teacher (dä hinder mir), jedefalls für mich...die andere händ etz wieder ihn, aber ich weiss nonig wär min neue lehrer oder lehrerin isch! uf dem bild häts mit mir 5 schwiizer, findet ihr use, weli? gseht mers?


hey people...

...und scho isch dä erschti teil vo minere schuel fertig! :-) guet, isch nid mal halb so lang gange, wieni etz no vor mir ha, aber egal, isch trotzdem scho öpis woni abgschlosse han! :-)

ha hüt mis diplom becho, dassi da 4 wuche a 5 stund pro tag id schuel bi und s'beschte isch, ich han e satisfactory vo 100%!!!!!!!!!! :-)))) das heisst, ich bin immer jede tag i de schuel gsi, ha nie gfählt, au nur e stund oder so, bi nie z spat cho usw...(für eus schwiizer isch das villicht nid e grossi leischtig, aber hät da sehr vill natione wo ewigs z'spat chömed, gar nid chömed, en halbe tag chömed, nur es paar stund, usw...) hihi...aber s'dokument hät mer gar nid passt, wills druf gschriebe händ "juliana susanna konig"! aber wänns scho kei "ö" mached, dänn sölleds wenigschtens "oe" schriebe, susch hani nid gad s'gfühl, dass das ICH bin! gseht so fremd us! drum hani am lehrer gseit, ich well es anders und etz chumi am mäntig dänn es "schöners" über! jipi...;-) ja, mer muess au a chline sache freud ha!

händ ja die wuche en andere teacher gah, will euse lehrer e wuche ferie gha hät und isch go surfe! ich säg eu, dä womer etz gha händ, dä mark, dä isch so de hammer gsi! :-) weiss au nid, hät chli öpis vom mister bean gha, aber nid ganz so blöd! isch eifach en mega witzebolle, verzellt immer seich und macht capriole und faxe! ;-)) hey mir händ amix so glachet i de schuel, isch unglaublich gsi zum teil...dä hät so guet chöne sache nahmache und spielle, echt he! aber de isch ersch sit 4 wuche wieder in australie, hät vorher 10 jahr in japan schuel gäh gha! etz isch er wieder zrugg cho uf manly, won er anschienend au ufgwachse isch. sini frau isch japanerin und sie händ e 2 jährigi mega herzigi tochter! dä häts würklich guet gmacht gha...

...tija...etz wirds dänn chli härter für mich, will i de cambridgekürs gahts nüm so locker zue und her! det muesch denn id schuel, d ufzgi würklich mache und vorallem hani chli doofi schuelziite 10.25-16.35! cha eifach nüm würklich an strand chille nach de schuel, will da wirds amix am 5i scho recht chüel und dä tag isch halt au scho fasch gloffe, will z.b. di meischte läde mached am 17.30 zue und etz womer bis am halbi 3 schuel gha händ isch das natürlich scho geiler gsi...aber s'hät au sini positive siite: zum biespiel chani länger schlafe, mir am morge meh ziit näh zum esse, meischtens wirdi dänn ällei si, dass gnüssi mängisch au no recht und da dure dass ich chan länger penne, chani au länger use am abig, d.h. ich han dänn die ziit vom abig eigentlich wieder dusse...:-))) also, gar nid sooooo schlimm....usserdem bisch da immer mit de gliche lüüt i de klass, d.h. chasch di chli besser ad lüüt gwöhne, lernsches besser kenne, häsch nid immer wieder neui gsichter und all wuche sötig wo gönd, wie etz! (power english chasch mache wänd wetsch, fangt jedi wuche ah und chasch au jedi wuche ufhöre...) guet, däfür häsch halt au di gliche lüüt, was andrersiits au chan langwilig werde oder schlecht si, wänd nid guet uschunsch mit dene, aber das glaubi etz weniger...irgendwie freui mi druf! am mäntig muessi nid würklich id schuel, d.h. am 11.30 mueni schnell a di allgemein inforundi wos mached und nachher chani wieder gah (ca. 30min) und ha de rescht vom tag frei!!!! :-) das heisst, nomal gnüsse, strand, strand, sunne, sunne und nomal sunne, hoffe nur, dass sie dänn au schient...*hope* dä rescht vom tag tüends dänn ebe dä andere neue studente alles zeige usw...das weiss ich ja scho und drum fangts eigentich ersch am zischtig ah! wird e churzi wuche, will am fritig isch ja scho wider frei, will oschtere isch! :-)))

ja, das wärs wieder für hüt, etz muessi mi denn go parat mache und denn gahts ab in usgang! :-) ghöred sicher nach em weekend wieder vo mir! :-) bis denn, wünsch eu au ganz es schöns weekend!

tschüssli