4. Weekend - Port Stephens

da simer i de sanddüne gsi...mega grossi sanddüne, aber nid eifach nur düne, s'hät au gras, tier, flüss, see und bäum gha...nei, es isch kei fatamorgana gsi, wie mer so schön seit! mini füess sind würklich nass gsi nachher! ;-)

sanddüne mit bäum däzwüschet...mer het chöne mit de kamel dureriite oder mit em 4x4 durekuve, aber mir sind halt z'fuess gange, isch au uh interessant und schön gsi

das sind mini schöne füess im weiche, wiisse sand! hät so cool usgseh hani gfunde...

gsehnd ihr d'flüss und s'wasser au? hät wunderbar usgseh...

gras isch us em wasser gwachse und überall händ d'frösch quaket...ha no nie vorher so öpis gseh gha! bi erstunt gsi wie nöch meer, sanddüne, bäum, wasser und alles zäme isch da in australie!

da sind mini delfin! :-)))))) ha so freud gha a dene, ich meine, isch nid selbstverständlich, dass mers gseht! sie sind mega nöch zu eusem schiff cho!

leider isch es chli schwierig gsi, zums immer guet verwütsche, die beweged sich so schnell und mer weiss nie, i weli richtig und wänn das gumped! aber ha doch es paar einigermasse gueti fotene anebracht! jedefalls chönder chli öpis gseh vo däne tier!

sind immer am spiele gsi! gumped, gschwumme, usw....ha eigentlich es paar filmli gmacht, aber irgendwie chani die nid uelade! heti eu gern zeiget, wil die sind vill besser als d'fotene worde! aber ha s'gfühl, datei isch z'gross zum uelade fürs australische internet! :-) eigentlich söts gah, aber ebe...:-((

da nomal es paar flosse....sinds echt au sicher delfin, oder öpe haifisch?! ;-)

da hanis gad guet verwütscht, mal nid di oberflosse, sondern hine d'schwanzflosse! :-)

das isch in port stephens nachem halbstündige marsch dur dä bush! wunderbari ussicht hät mer vo det obe gha, echt en traum! da hät sich s'schwitze und s'laufe glohnt! :)

das isch d'ussicht uf di ander siite gsi und chli vo wiiterune! eifach wunderbar! es git so schöni flecke uf däre erde! mängisch hani dänkt, die kalender wo mer amix händ mit so fotene vo stränd und meer, seged retouschiert worde, aber isch nid wahr, die stränd sind würklich so wiis und s'meer isch würklich so türkisfarbig und schimmeret verschiede! eifach zum gnüsse...

da nomal s'gliche, chli wiiter links, ä sandbank im meer...

damit ihr mir au glaubed, ich bin würklich da gsi und ha alli fotene selber gmacht! naja...ussert gad die, ich meine, cha mich ja schlecht selber fötele! ;-)

das isch im reptile park ca. e stund vo sydney weg! en wunderschöne dingo, gseht ähnlich us wie en hund vo dä grössi und dä form, aber d'farb entspricht eher ame fuchs!

das isch es mega herzigs kangoroo gsi, uh zahm, fiin und herzig! :-) isch glaub no jung gsi...jedefalls häts eim richtig ghebet, wänn mers gfüeteret hät! fresse tüends mega vorsichtig, also hät nie weh ta oder so!

d'kangoroo sind frei umäghüpft! hät ganz vill verschiedeni gha, grossi, mittleri, chlineri!

das sind zwei koala, wahrschindlich s'mami und s'junge bim frässe uf em eukalyptusbaum!

ime abgsperrte see häts ca. 15 aligatore gha! di einte sind echt wie tod detgläge, di andere sind umegschwumme! sind scho no idrücklich gsi, die viecher! aber nid gad nett usgseh tüends...wür mi glaub nid mit ihne alegge...;-)

dänn häts au no fledermüüs gha, sind scho ganz spezielli tier, ha die no gar nie so gnau aglueget gha vorher! aber wie di hangend und sich fortbeweged?! dänn ihri luschtige flügel, dä körper aber wie vonere muus...irgendwie einzigartig!





Hoi Ihr Liebe!

das weekend hani mega vill erlebt und uh mega schöni idrück vo dem land becho! :-) isch würklich ganz lohnenswert gsi!

d'schuel organisiert ebe immer so aktivitäte usw...und ich bin das weekend mitgange und zwar uf port stephens isch es gange! das isch ca. 3 stund vo sydney wäg! sind jedefalls mit em büssli vo dä schuel det anegfahre worde! aber fang etz vorne ah:

am samschtig morge am 8.00 Uhr hämer eus vor de schuel müesse treffe! (ich han nur ca. 1.5 h schlaf gha, willi am fritig no recht lang im usgang gsi bin! :-)) dänn isch dä witz los gange, dä fahrer isch fäng am 9ni cho, d.h. e volli stund verspätig he! unglaublich...da hetti doch gad no vill länger chöne schlafe...:-( aber nei, mir schwiizer sind ja pünktlich, aber ebe nid alli natione! ;-) naja...isch halt do amix so, da muess mer sich dra gwöhne! mir sind halt eifach zu pünktlich und korrekt i de schwiiz, was mängisch au nid guet isch! anyway...am 9ni simer dänn abgfahre und nach ca. 90min fahrt simer im reptile park gsi! det hämer leider nur e stund ziit gha, zum all die tier aluege, fötele usw...aber wänn er halt z'spat chunt, dänn wird halt nochher kürzt...jedefalls isch es chli churz gsi, aber trotzdem hämer vill tier gseh: kangoroo, koala, schlange, vögel, fledermüüs, schildchröt, aligatore, usw...richtig fründlichi tier, aber au recht gfährlichi und bösi! :-) nach eusem bsuech bi dä animals, simer wiitergfahre uf port stephens und dänn simer zersch mal an hafe go z mittag esse! nach ca. einere stund simer dänn wieder losgfahre und neume ime nationalpark i de nächi en bushwalk go mache! alles duruf, voll heiss isch gsi und ich han eifach gschwizt wie e sau, alles hät kläbet und wäh, isch grusig gsi! aber es hät sich glohnt, will mer hät vo det obe e super ussicht gha ufs meer, beaches, usw...eifach traumhaft! ussert spinne, die sind nid so toll gsi, aber die häts en mass gha i dem bush! sind aber glücklicherwiis nid gfährlichi gsi! :-) nach eme ziitli ussicht gnüsse, simer dänn alles wieder abe gschuenet und wieder is büssli ghocket und zu eusem campingplatz gfahre! isch irgendwo recht im grüene gsi, i de nächi vome beach, kangoroo sind frei det umegloffe usw...! isch echt schön gsi, händ selber nid campet, hät ebe au no so en art youthostel gha,6-er zimmer! die hämer dänn gad gfüllt, sind ja ca. 20 lüüt gsi ( a ja, vo dene sind 15 schwiizer gsi, 3 dütschi und zwei wo susch neume und dä drvier und euse leiter (aussies)! das heisst, händ sehr vill dütsch gredt!) nachher simer nochli an beach det i de nächi, aber d'sunne isch scho gli abe und dänn wirds amix chalt und drum simer dänn wieder zrugg! mir händ dänn müesse go poschte für euses barbecue am abig und drum simer wieder is büssli und zum nächschte lade gfahre! hät ebe nid gad um de egge eine gha...;-) händ voll fett ikauft und dänn händ all ghulfe choche, zuebereite, wäsche, brätle usw...es isch no voll friedlich gsi und luschtig! händ dänn nachher det nochli trunke, gredt, glacht und eifach fun gha ime riise chreis! irgendwie uh schön, wie früehner amix so ime klasselager halt! ich bin dänn ca. am 00.30 is bett, will ich halt scho i de nacht vorher nid vill gschlafe han und di einte sind no bliebe! aber isch nid schlimm gsi, has vorher luschtig gha und im zimmer hät mer eh alles ghört, was es dusse gseit und gmacht händ! gschlafe hani au guet i dem schlag!

am nächschte morge simer dänn scho am 8ti wieder ufgstande, händ zmörgelet und am halbi 10ni isch es losgange an hafe abe! am 10ni isch nämli euses schiff gfahre! mir händ e bootstour uf em ozean gmacht und dänn hämer eifach die schönschte tier vo de welt gseh! DELFIN!!! :-)))) ha no nie so vill delfin so näch und i freiere natur gseh! es isch echt dä hamme gsi! s'isch glaub e ganzi familie gsi, ca. 6-7 delfin! die händ gspielt, sind gumpet und händ sich präsentiert! sind ca. 2 meter zum boot anecho und 2-3 mal underem boot duregschwumme! richtig schön! ha mi so gfreut gha, dass mer gseh händ, will es isch nid selbstverständlich, ich meine entweder sinds det oder ebe nid, ich meine die sind frei! is wasser hämer nid därfe (nur hine is netz vom boot, dänn häts eus mitzoge), wills e gschützti area isch! wär natürlich susch sofort gange...:-) nach ca. 2 h simer wieder zrugg an hafe, händ öpis chöne esse det und dänn isch es wiiiter gange i sanddüne! au ganz schön, chönt kamel riite, mit em quat dure fahre, oder eifach mti eam 4wd! aber mir sind z'fuess gange und händ die sanddüne gnosse! hät zwüschet dure immer wieder wasser, z.t. chlini see oder flüüs gha, pflanze und eifach sand, sand. sand! eifach wundervoll! nachher simer no ine winery und händ chöne wii degustiere, händ ja da au ganz vill wii in australie! nachher isch es dänn scho wieder hei, händ ja schliesslich au no e langi autofahrt mit recht vercher vor eus gha!

uf jedefall isch es es wunderschöns weekend gsi! super wetter, mega vill schöni erlebnis, idrück, tier usw...hät sich echt glohnt!

wünsch wieder e gueti wuche und bis zum nächschte mal!

Ps: etz isch das mit de bilder wieder gange...:-) aber leider gahts mit de filmli nid, aber villicht bruchts au eifach es paar täg! ihr gsehnds ja denn, wänn er schön brav wie sichs ghört, regelmässig gönd go nahläse und luege! :-)